Erstveröffentlichung von 'Max und Moritz'

am 4. April 1865 im Münchner Verlag Braun & Schneider

'Eine Bubengeschichte in sieben Streichen' von Wilhelm Busch .

ABCD

Für die Rechte an Buschs Bildergeschichte zahlte Kaspar Braun diesem einmalig 1.000 Gulden. Dies entsprach etwa zwei Jahreslöhnen eines Handwerkers und war für Wilhelm Busch eine stolze Summe. Für Kaspar Braun und seinen Verlag sollte sich das Geschäft mittel- und langfristig als Glücksgriff erweisen. Der Verkauf von 'Max und Moritz' verlief zunächst schleppend. Erst ab der zweiten Auflage 1868 verbesserten sich die Verkaufszahlen und in Buschs Todesjahr 1908 zählte man bereits die 56. Auflage und mehr als 430.000 verkaufte Exemplare. Bereits zu Wilhelm Buschs Lebzeiten wurde das Werk in zehn Sprachen übersetzt. 1997 gab es mindestens 281 Übersetzungen in Dialekte und Sprachen, davon über 60 in deutschsprachige Dialekte. des Weiteren gibt es mehrere Übersetzungen ins Lateinische und auch eine altgriechische Version. 

Weitere Infos:  

Max on Moritz

Ääne Jongageschechte ei sieba Stecklan
ei's Pauersche ieberträän
vu Gertler Erhardtan (Glootz)
ABCD

Max on Moritz, wie se woarn,
Hielda oalle Welt zom Noarrn.
Uufgemoalt on zom Betrachta,
Siste woas die Beeda machta.
Warscht vielleichte drieber lacha,
Weil se doas met dir nee macha,
Oaber tu ocke bedenka:
Wie des treibst, watt's diech a lenka!

Vannaweg

Nä, woas liest on häärt ma heute,
Vu a Kendarn bloos ihr Leute!?
Neuliech erschte vu daan Della,
Max on Moritz, - em Goot's Wella!

Die woarn a doarch guude Lährn,
Nee a Beßla zo bekährn.
Toata heechstens drieber spotta,
Weil se nischt eim Steppel hoatta.
Fer die Tommhäät woarn se gutt,
On es fahlt 'a nee oa Mutt.
Äppel, Bärna, Quatschka stahla,
Leute frech zom Offa haala
Uubadruuf nooch Viecher queela!
Och, woas kennt ma oalls derzehla! -
Bloos ei Kärche oder Tschule,
Stelle setza off'm Stuhle,
Doas woar fer die Beeda nescht,
Oaber, 's hoat se doch derwescht.
Nä, doas woar a biese Deng,
Wie's daan beeda Perschlan geng!
Derwääjen ies, woas se getrieba,
Uufgemoalt on uufgeschrieba.

Erschtes Steckla

Moancher tutt siech sehr bemiehn,
Faaderviechzeug uufzoziehn.
Erscht amoal der Ääer wääjen,
Sein die Veechel schonn a Sääjen.
Zweetens derf ma nee vergassa,
Koan ma se oals Broata assa.
Drettens sein se zo beroppa,
On die Faadarn koan ma stoppa,
Ei die Kissa, ei die Bette,
Weil ma's ganne woarm halt hätte.

Witwe Bolte, satt ock har,
Wullde halt asu woas a.

Denn oa Hinnarn hoat se dreie ,
On änn Hoahn miet ei der Reihe.
Max on Moritz doochta glei:
Doo ies woas fer ons derbei.
Bessres kunde siech nee bieta,-
Flink werd Bruut atzwee geschnieta,
Ei vier Tääle, jedes Stecke,
Wie a klääner Fenger decke.
Ieberkreutzt, ganz vanna droa,
Kneppa se die Stecklan oa.

Leen die Fäden dann genau,
Ei a Hof der guuda Frau.

Kamm hoat doas der Hoahn derschnoaba,
Hoat a schonn a Koop gehooba.
Kreht ganz laut : Kikerikie!
's renna glei die Puttlan hie.

Hoahn on Hinner picka druuf,
Jeder siech a Bräckla uuf.

Noach em Schlenga, satt ock satt!
Kund kä äänzjes nemme fatt.

Zärrn siech salber kreuz on quaar,
Met daan Brocka hie on har.

Flattarn ängstliech ei die Hieh,
Jesses nä! Satt bloos nee hie!

On se blein met ihan Stränga,
Oa äm därra Oaste hänga.
A goar jämmerlieches Klään,
Gieht etza doarch Mark on Bään.

Dreimoal klatschts nooch! Ei! Ei! Ei!
Met'm Laaba iss verbei.

Witwe Bolte ei der Koammer,
Häärt eim Bette doas Gejoammer;

Bieses oahnt se on stärzt naus:
"Goot du nä!" Woar doas a Graus.

"Kullert, kullert ock ihr Träpplan,
Datte, datte ei a Äppan,
Meine Hoffnong on mei Traam,
Baumelt off'm Oappelbaam!"

Glei dernooch, ei vuulem Schmerze,
Foast se siech a schonn a Herze,
Nemmt doas Masser, setzt es oa,
Schnätt se vu daam Oaste roa.

On met tiefem Trauerblecke,
Wackelt se ei's Haus zorecke.
Soa, doas Steckla ies verbei,
Oaber's zweete kemmt ju glei.

Zweetes Steckla

Wie die Witwe Bolte donda,
Hoallwägs oalls aweng verwonda,
Toat se hie on har semmliarn,
Woas de etza selt poassiearn?
Ob ma die Verstoarbna kende,
-Die zo zeitiech on geschwende,-
Ganz em Stella on ei Ährn,
Gutt gebroata nooch verzährn.
Freiliech woar die Trauer gruuß,
Wie se nackiech on ganz bluuß,
Oabgeruppt oam Uufa hinga,
Die vu Taaga nooch on ginga,
Iebra Hof, ieber a Goarta,
Emmer hibsch ein Sande schoarrta.-

Och, die Bolten flärrte wieder,
On der Spetz toat prav on bieder.
Max on Moritz mochta's richa,
Schnell offs Daach toata se kricha.

Doarch a Schorstään zom Vergnieja,
Sahn se datt die Hinner lieja,
Die schonn ohne Koop on Gorjan,
Goldbraun ei der Pfoanne schmorjan.

Groade gieht met'm tiefa Taller,
Witwe Bolte ei a Kaller.

Zo da brauna Hinnerbrost,
Kriecht off Sauerkraut se Lost,
Schien met Zwiebel on met Speck,
Potzt se ganze Tallvel weg.

Off'm Dache ies woas luus,
Ääne Frääde riesengruuß.
Max hoat, doas a oalles kloappt,
Ääne Angel mietgeschloappt.

Wuppdiech! Doarch a langa Schlond,
Kemmt der erschte Voojel schonnt.
Klack! Oam Hoaka hängt der Zwette;
Husch! Zor Esse naus der Drette;
Wupps! Der Vierte da verschwend,
Doarch a Schornstään, wie der Wend.
Spetzla soach doas ganz genau,
On a machte glei Radau.

Flink vum Dache, fatt blooß fatt,
Met der Beute, satt ock satt!

Jeckersch nä, woas sool doo waan,
Wenn die Bolten doas watt sahn!?

Doo stieht se wie oagenitt,
Wie se ei die Pfoanne sitt.

Oalle Hinner die woarn fatt.-
"Spetz!" doas prellt se, "Watt ock, watt!

Hundoos! Verpochtes Viech!
Oaber etz versohl iech diech!"

Met'm Läffel, kreuz on quar,
Zieht se iebersch Spetzla har.
Da zerrt naus on jault derbei,
Denn a fiehlt siech scholdenfrei.

Max on Moritz, schien verstackt,
Schnoarcha, weil se vuulgesackt.
Bäuche hoan se, gruuße Beula,
Ei a Guscha Hinnerkeula.

Doas zweete Steckla ies verbei,
Oaber's Drette kemmt ju glei.

Drettes Steckla

Oalla woar a gutt bekannt,
Schneider Bäck wurd a genannt.

Wochakroam on Roockoazieche,
Schwoalbaschwänze zor Genieche,
Hoosa, Westa met zich Toascha,
Decke Joppa on Gomoascha, -
Oalle Klonkan die ma wullde,
Machte Bäck, wenn a on sullde.
On a toat siech nee ärn drecka,
Woas zo ändarn oder flecka.
Drooselte a Knäppla rem,
Woar doas goar nee asu schlemm.
Henda, vanna, eins, zwei, drei,
Wie on wu, a machts halt glei.
Oalles koan der Määster Bäck,
Denn doas ies sei Lääbenszweck.
Joa, asu änn guuda Moan,
Jeder mecht zom Freunde hoan.
Max on Moritz oaber doochta,
Wie se daan ei Raasche broochta.
Nämliech, noahnde bei säm Hause,
Lief 'n Baache met Gebrause.

Iebersch Woasser leit a Braat,
Doas verbend änn Troampelpfaad.

Max on Moritz tun ganz ääja,
Heimliech fix a beßla sääja.
Met ämm Raatze glei a Stecke,
Schneida se doo ei die Brecke.
Wie die Sääjerei verieber,
Plääka se zom Hause nieber:

"Rietzraatz, rietzraatz, Schneidernaatz,
Kemmt zom Gassla reigeraatzt!"
Oalles kunde Bäck verträän,
Bloos nee Schneidernaatz zo sään!
Wenn a 's äämoal bloosich hoarte,
Ei'm die Buust wie Feuer bohrte.

Uufgescheucht, met seiner Elle,
Berscht a fer die Haustierschwelle.
Häärt eim Ärjer zom "Rietraatz,"
Emmer wieder: " Schneidernaatz!"

On schonn ies a off der Brecke,
Krach! Doo brecht se ei zwee Stecke.

Wieder klengt's vu weitem keck:
"Schneidernaatz!" Dann plumpst a weg.

Wie a on ies huuchgekoamma,
Kemmt a Gänsepoar geschwoamma.

On bevor a ganz versackt,
Schnell a nooch a Flossen packt.

Beede Pfuuta ei der Hand,
Fliecht a miet' a o a Rand.

Na, doas woar nee groade schien,
Schwuppenoaß sitt man doo giehn.

Glei dernoochern vu daam Flattarn,
Kriecht a ennerlieches Mattarn.

Doo muuß ma die Bäck'n preisa,
Die me'm hääßa Biejeleisa,
Ieber Bäckas Wampla gieht,

Bes der Kroampf siech ganz verzieht.
Jeder sääte: " Weßt 'ärn schonnt!?
Bäck ies wieder ganz gesond!"

Soa, doas Steckla ies verbei,
Oaber's vierte kemmt ju glei.

Viertes Steckla

Ääs, doas selda oalle wessa,
Doaß die Menscha lanna mesa.
Jeder meßte, wenn a's koan,
's Alphabeet eim Steppel hoan.
Nee allääne Laasa, Schreiba,
Sool vernempftiech ma betreiba;
Nee off's Rechnan blooßiech sahn,
Siech derwääjen Miehe gaan,
Sondan a die weisa Lährn,
Muuß ääs met Vergniejen häärn.

Doas ma's met Verstande machte,
Lährer Lämpel drieber wachte
Max on Moritz mächt ma sään,
Toat doas wetter goar nee frään.
Nä, doo goaba se nischt druuf,
Poaßta nee derwääjen uuf.
Nu, doo woar der prave Lährer,
Doch vum Tobak a Verährer.
Woas, doas ies doch kääne Frooche,-
Nooch da ganza Taagesplooche,
Asu a guuder aaler Moan,
Siech a werkliech genna koan.
Max on Moritz ieberleeta,
Wie se daam a Deng woll drehta?
Ob a met sänn Tobakpfeifa,
Datt vielleicht wär oazogreifa?
Äämoal, es woar Sonntiechs goar,
Lämpel oa der Orjel woar,

On o a Registarn zuuch,
Doas doas Kärchadaach siech buuch.
Schliecha siech die beeda Ranga,
Ei sei Häusla met Verlanga,
Wu die Määrschaumpfeife stoand,
Die der Maxe a glei foand.

Moritz, aus der Hoosatoasche,
Zieht die Flentapolverfloasche.
Schitt oalls ei die Pfeife nei,
's ies die räänste Zauberei. -
Schnelle etz Reißaus genomma,
Glei watt Lährer Lämpel komma.

Da dreht em die Ecke nemm,
Groade schonn a Schlessel remm.
Seine Nota hoat a miete,
Loascht nu hääm, met miedem Schriete,

Ganz zofriede eim Gemitte
Nieber ei die aale Hitte.

Dankboarkeit zieht ei em noa,
Wie a zend sei Pfeifla oa.

On dann sprecht a: " Woas änn fräät,
Ies halt die Zofriedenhäät!"

Rums! - Doo gibts änn gruußa Knoal,
Doas ei Brocka ieberoal,
Flieja oalle Mebelstecke
On eim Quoalme hooka decke,
Seejan Teppla, Tintafoaß,
Tobaktuuse, Woassergloas.

Onderm Doampf, doar oalls bestaabt,
Sitt ma Lämpel, dar nooch laabt,
Oaber off'm Recka liecht,
Denn a hoat woas weggekriecht.

Noase, Hand, Gesechte, Ohrn,
Die sein schwarz, wie bei a Mohrn.
A die Loada off der Bärnne,
Sein rasiert bes off's Gehärnne.

War sool etz die Kender lährn,
A Verstand bei a vermährn?
War sool fer a Lämpel macha,
Seine ganza wechtja Sacha?
On erscht räächa koan a nee,
Denn die Pfeife ies atzwee.

Met der Zeit werd oalles gutt,
Bloos die Pfeife bleit kaputt.

Soa, doas Steckla ies verbei,
Oaber 's femfte kemmt ju glei.

Femftes Steckla

Ganz ägal oa welcha Ecka,
Ääner hoat äann Onkel stecka.
Da sool siech em a bemiehn,
Denn asu woas fend a schien.
Emmer freundliech tutt man grissa,
Räumt em oalles vu a Fissa.
Brängt 'm groade woas a wiel,
Zeitong, Pfeife, Faaderkiel,
Wenns a'n ärjend wu on dreckt,
Räßt on bäßt, oder goar zweckt,
Ies ma eifriech bei der Hand,
Bes die Schmerza sein verbannt.
Oder doas nooch a poar Priesa,
A der Onkel meßte niesa,
Sprecht ma: " Prost!" on freet woas hoat?
"Dankscheen!" - "Na, doo half Euch Goot!"
Kemmt a speet oam Oamde hääm,
Tutt ma'm oalls zo Hofe trään
Stiefan, Pootscha, Metze, Weste,
Steckt a woarm, ies doas doas Beste.
Denn met sechna wenzja Sacha,
Koan ma 'm Onkel Frääda macha.
Max on Moritz, och Herr je!
Poaste woll doas Ganze nee.
Härcht ock, met woas fer am Denge,
's Onkel Fretzan biese genge.

Na, ihr weßt doch ganz gewieß,
Wenn Mäakaaferzeit on ies.

Ei a Bääma hie on har,
Fliecht on krecht on kroappelt dar.

Max on Moritz satt ock oa,
Schittan se vum Baame roa.

On se spärrn, du meine Gitte,-
Oalle Viecher ei die Titte.

Loan se danne wieder glei,
Onder Onkels Ziche frei.

Miede ies der Onkel, siste,
On a klattert ei die Kiste.

Nooch am Beßla ei siech hoarcha,
Fengt a a schonn oa zo schnoarcha.

Doo off äämoal knesterts, rääschelts,
Off der Decke kroatzts on knärschelts.

Ääner, dar de vanna droa,
Grefft glei Fretzas Noase oa.

"Ha!" pläkt a, "War zweckt 'n miech!?"
Packt a schonn doas biese Viech.

Druuf met Klatscha on met Klooppa,
Sitt ma'n aus 'm Bette hoppa.

"Do!" Schonn wieder hoat a änn,
Oam Genecke o a Bänn.

Onkel Fretze keilt on schleet,
Oalles woas siech em a dreht.

Dann ei seiner gruußa Wuut,
Quetscht on troampelt a se tut.

Oalle iss met euch woll jetzt!?
Gell, ihr Eeßer, etza etz!

Senkt dann ei die Kissa nieder,
Onkel Fretze schnoarcht glei wieder.

Soa, doas Steckla ies verbei,
Oaber 's sexte kemmt ju glei.

Sextes Steckla

Bäcker bränga siech hoalb em,
Groadenet, em Uustarn rem,
Wenn se lauter guude Sacha,
Fer die Feiertaage macha.
Max on Moritz schmeltzt der Gauma,
Guttzlan hooats datt, zom Verstauma!

On derwääjen hoat entschlossa,
Määster 's Backhaus oabgeschlossa.

Also, wiel doo ääner moppsa,
Muuß a doarch die Esse hoppsa.

Huuusch! Doo koamma schonn zwee Roaba,
Doarch die Esse noa gestoaba.

Och, se stärza, - siste, siste!
Glei ei 's Mahl doo ei der Kiste.

Doo! Doo sattersche a baale,
Schluhweiß! On zengstrem met Mahle.

Oaber glei, zo iham Vergnieja,
Sahn se Pratzalan datt lieja.

Knacks!! - Doo gieht der Stuhl atzwee;

Jeckersch! Jeckersch, je mie nee!

Ganz eim Tääge eigehellt,
Ies doas nee a Joammerbeld?

Schonnte kemmt der decke Bäcker
Packt siech glei die Zockerschlecker.

Weckelt se eim Tääge ei,
Bruute war'ns em eins zwei drei.

Ei a Uufa, dar nooch glieht,-
Nei! - Doas euch oam Hendarn brieht!

Raus dermiete, aus der Glutt;
Denn etz sein se braun on gutt.

Jeder denkt, etz sein se fatt.-
Oaber nä! Nä! Satt ock satt!

Knack! Knack! Knack! Ärnt wie zwee Mäuse,
Frassa se siech doarchs Gehäuse.

On der Bäckermääster sitt:
"Och Herr je! Doo lääft der Kitt!".

Soa, doas Steckla ies verbei
Oaber 's letzte kemmt ju glei.

Letztes Steckla

Max on Moritz, wehe oich!
Etza giehts ioch glei oas Zoich!

Warom messa die zwee Frecha,
Lächer ei die Säcke stecha??

Satt, doo schleppt der Pauer Mecke,
Groade seine Kärnersäcke.

Oaber kamm, doas a on naus,
Lääft der erschte Saak schonn aus.

Sprecht eim Emdrehn : "Haat Iech deechte,
Da verliert schonn oa Gewechte!"

Ha! Doo sitt a vuller Frääde,
Max on Moritz eim Geträäde.

Schwupps! On flink, on zack, zack, zack!
Sackt a ei , doas Lumpapack.

Max on Moritz werd ganz schwiele,
Denn etz komma se zor Miehle.

"Meller! Meller! Komm ock schnelle!
Moahl mer doas doo off der Stelle!"

"Har dermiete! Hoarttiech!" sprecht a,
"Nei! Met daan zwee biesa Frechta!"

Racke! Racke! Racke! Racke!
Knärscht die Miehle met Geknacke.

Och, woas muuß ma schließlich sahn,
Koan aus sechta Kallslan waan!?

Endliech, doas mersch nee vergassa! -
Hoan die Gänse se gefrassa.

Henderhar

Kam ies Trauer eigekährt,
Wie eim Dorfe ma's erfährt.
Witwe Bolte, wääch on melde,
Sproach: "Etz bien iech erscht eim Belde!"
"Ju, ju!" Määnte doa der Bäck,
"Jongastecklan hoan känn Zweck!"

"Sattersch! Sattersch!" sääte Lämpel,
"Asu giehts ä'm tomma Plempel!"
"Freiliech !" rief der Bäckermääster,
"Luuder woarn se schonn, die Ääster!"
"Ausgezoahlt!" schempft Onkel Fretze,
"Hoan siech etz die tomma Wetze!"

"Jo, jo!" hiehnte da Pauer Mecke,
"Die woarn halte zu gemecke!"
On eim Oarte gings zengstrem,
Em die Beeda iss nee schlemm!
"Goot sei's gedankt, es ies verbei,
Met der Iebeltäterei!"